Su'aalaha Inta Badan La Isweydiiyo

Hadda ma jirtaa isu keenista qoyska?

Waqtigan xaadirka ah ma jiro sharci cusub oo ku saabsan isu keenista qoyska. Sharciga cusub waxay u badan tahay inuusan dhaqan gelin ka hor Agoosto 2026. Intaas ka dib, isu keenista qoyska mar kale way suurtagal noqon doontaa, laakiin waxaa lagu dhaqmi doonaa xeerar cusub.

Si kastaba ha ahaatee, Laanqayrta Cas xaaladaha qaarkood waxay codsiyo gudbisaa xitaa hadda. Tusaale ahaan, waxaan sidaas samaynaa haddii ilmo idinka mid ahi haddii kale uu gaadhi lahaa da’da 18 sano.

Maxaa iska beddelaya sharciga cusub?

Waxaa jiri doona dhowr isbeddel. Isbeddelka ugu muhiimsan waa in mustaqbalka qoyska la filayo in la siiyo kaarka “Rot-Weiß-Rot – Karte plus”.

Waxa kale oo jiri doona liis sugitaan oo go’aaminaya tirada xubnaha qoysaska ee sanad kasta loo oggolaanayo inay soo galaan Austria.

Qoyskaygu ma u baahan yahay inuu codsi cusub gudbiyo marka sharciga cusub la dhaqan geliyo?

Maya.

Haddii qoyskiinnu hore u gudbiyey codsi, go’aanka codsigaas waxaa lagu gaadhi doonaa xeerarka cusub.

Waa maxay kaarka “Rot-Weiß-Rot – Karte plus”?

Kaarka “Rot-Weiß-Rot – Karte plus” waa oggolaansho degenaansho oo Austria ah. Wuxuu shaqaynayaa hal sano. Waxa kale oo la codsan karaa in la kordhiyo.

Wuxuu qofka u oggolaanayaa inuu Austria ka shaqeeyo. Laakiin qofku ma heli karo kaalmooyinka bulshada.

Maxay dadku u sheegayaan in mustaqbalka qoysas yar loo oggolaan doono inay Austria yimaadaan?

Mustaqbalka, sanad kasta kaliya tiro cayiman oo xubnaha qoyska ah ayaa loo oggolaan doonaa inay Austria yimaadaan.

Haddii liiska sugitaanku meel bannaan waayo, qoysku waa inuu sugaa sannadka xiga oo uu rajaynayaa inuu markaas helo meel.

Codsiga isu keenista qoyska waxaa la bilaabi doonaa oo keliya marka boos la helo.

Ma jiraan wax ka reeban xeerkan?

Haa.

Haddii qoyskiinnu codsiga gudbiyey saddex sano ka hor, lama gelin karo liiska sugitaanka. Waa in la siiyaa meel, codsigana waa in la farsameeyaa.

Sidoo kale, xaaladaha aadka u adag waxaa la samayn karaa ka reebis. Tusaale ahaan: Haddii carruurtiinnu meel kaligood joogaan oo aanu jirin qof daryeeli kara.

Yaa farsameeya codsigayga?

Qoyskiinnu waa inuu codsiga ka gudbiyaa safaaradda Austria.

Safaaraddu waxay waraaqaha u dirtaa Hay’adda Federaalka ee Socdaalka iyo Magangelyada (BFA). BFA ayaa farsamaysa codsiga oo go’aan ka gaadha.

Ma dooran karaa safaaradda aan tagayo?

Maya.

Qoyskiinnu waa inuu tagaa safaaradda mas’uulka ka ah xaaladdooda. Badanaa waa safaaradda ku taalla waddanka uu qoyskiinnu ku nool yahay. Haddii aad su’aal ka qabtaan safaaradda saxda ah, fadlan la xiriira Laanqayrta Cas.

Maxaa dhacaya haddii aan 18 jirsado inta ay socoto habraaca isu keenista qoyska?

Inaad gaadho 18 sano sabab uma aha go’aan diidmo ah.

Haddii aad leedahay ilaalin hoosaad: Waxa muhiimka ahi waa inaad ka yarayd 18 sano markii qoyskiinnu gudbiyey codsiga isu keenista qoyska.

Haddii aad leedahay magangelyo: Waxa muhiimka ahi waa inaad ka yarayd 18 sano markii aad gudbisay codsiga magangelyada.

Maxaa dhacaya haddii ilmahaygu 18 jirsado inta ay socoto habraacu?

Dhib ma leh haddii ilmahaagu 18 jirsado inta ay socoto habraaca isu keenista qoyska.

Haddii aad leedahay ilaalin hoosaad: Waxa muhiimka ahi waa in ilmahaagu ka yaraa 18 sano markii uu gudbiyey codsiga isu keenista qoyska.

Haddii aad leedahay magangelyo: Waxa muhiimka ahi waa in ilmahaagu ka yaraa 18 sano markii aad adigu gudbisay codsiga magangelyada.

Ma khasab baa inaan shaqeeyo oo guri haysto si qoyskaygu u iman karo?

Guud ahaan, waa inaad haysataa dakhli ku filan iyo hoy ku habboon si qoyskiinnu u iman karo Austria. Laakiin waxaa jira dhowr ka reebis:

• Haddii aad heshay go’aan magangelyo oo wanaagsan, qoyskiinnuna codsiga gudbiyo saddex bilood gudahood laga bilaabo go’aankaas, khasab ma aha inaad shaqaysid.
• Haddii aad ka yar tahay 18 sano oo aad rabto inaad waalidkaa iyo walaalahaa keento, khasab ma aha inaad shaqaysid.

Sharciga cusub ma leeyahay waxyaabo soo hagaagaya?

Haa.

Mustaqbalka, qoysaska dadka haysta ilaalinta hoosaad waxay u baahan doonaan inay sugaan laba sano oo keliya ka hor inta aysan codsi gudbin.

Ma suurtagal baa in la sameeyo baaritaanka DNA?

Haa.

BFA waxay codsan kartaa baaritaan DNA. Adiga ayaa iska bixinaya kharashka baaritaanka. Lacagta dib laguu soo celin maayo.

Qoyskaygu ma awoodi doono inuu Austria ka codsado magangelyo?

Weli way suurtagal noqon doontaa in codsi magangelyo la gudbiyo marka la yimaado Austria. Inta badan, qoyskiinnu wuxuu heli doonaa isla xaaladda ilaalineed ee aad adigu haysato.

Qoyskiinnu waa inuu Austria gudaheeda ku go’aansadaa inuu qaato kaarka “Rot-WeißRot – Karte plus” ama inuu gudbiyo codsi magangelyo. La-taliyahaaga Laanqayrta Cas ayaa kaa caawin kara go’aankaas.

Intee ayay qaadanaysaa ilaa qoyskaygu iman karo? Ma iman karaa isla marka sharciga cusub la dhaqan geliyo?

Weli ma jiro waayo-aragnimo laga helay sharciga cusub. Waxaan u malaynaynaa inay wakhti qaadan karto ka hor inta hay’aduhu si f can ula qabsan xeerarka cusub.

Xitaa kiisaska hore loogu gaadhay go’aan wanaagsan dib ayaa loo eegi doonaa.

Dhammaan kiisaska, BFA waxay dalban kartaa dukumenti dheeraad ah, sababtoo ah waa inay go’aanka ku gaadho sharciga cusub. Tani waxay dheereyn kartaa habraaca.

Sharciga cusub wuxuu yeelan doonaa liis sugitaan oo go’aaminaya tirada xubnaha qoysaska ee sanad kasta loo oggolaanayo inay Austria soo galaan. Weli ma garanayno inta boos ee sanad kasta jiri doonta.

Arrintan ayaa sidoo kale saamaynaysa inta ay qaadanayso ilaa qoyskiinnu iman karo.

Ma dhakhso badnaanaysaa haddii aan qareen qabsado?

Adiga ayaa go’aansan kara haddii aad rabto inaad habraaca isu keenista qoyska ku fuliso qareen, Laanqayrta Cas ama kaligaa.

Ma garanayno habka ugu dhakhsaha badan.

Xaggee ayaan ka heli karaa macluumaad dheeraad ah oo qoyskayga ku saabsan?

Waxa ugu f can waa inaad iimayl u dirto Laanqayrta Cas cinwaankan:

fzf@roteskreuz.at